Edlira Mema, Miss Shqipëria 2005 ka qenë një prej më të bukurave, që kanë pozuar në kalendarin e misseve të Petri Bozos. Por, dikujt nga “Top Channel”, gabimisht i shkoi ndër mend se ajo mund të bëhej dhe një prezantuese. Kështu Edlira Mema shfaqet në ekranin e “Top Channel” për të drejtuar një emision me Funny Video, ku në përgjithësi vetë drejtuesit e emisioneve të tilla, duhet të karakterizohen nga një sens humori. Por, batutat në fakt të recituara saktë nga Edlira, (sigurisht të mësuara përmendësh nga skenari), tingëllonin si vjersha fëmijësh, që kur i mungon spontaniteti, nuk bëjnë më për të qeshur, sado të gjetura qofshin.
Jo më kot, në formate emisionesh të tilla, që shfaqen në televizione të huaja, bukuroshet mjaftohen duke luajtur rolin e velinave. Edhe për Edlirën, do të kishte qenë shumë më mirë, që të shfaqej në ekran sa për treguar trupin e bukur. Ndërsa në skenar, më mirë t’i takonte edhe asaj vetëm fjala “publicitet”. Për fat, programi transmetohej i rregjistruar, duke zhdukur “rrëshkitjet” e gojës apo gafat e drejtimit live, por edhe kështu Miss Shqipëria, nuk shkoi përtej nivelit të një prezantuese të zgjedhur gabimisht.