E dini se cili është sendi më i çmuar që zotëron Ilva Tare? Po gjendjen e saj shpirtërore? Po mashkulli që pëlqen më shumë? Ajo na i ka rrëfyer neve. Që nga Londra. Ne po jua rrëfejmë juve
Cila është ideja jote për lumturinë e vërtetë?
Po të përshkruhej me fjalë, s’do mund të ishte lumturi e vërtetë.
Cila është frika më e madhe?
Të humbas kujtimet.
Kë person të gjallë admiron më shumë?
Prindërit e mi.
Cili është ai tipar i të tjerëve që të ngjall mëshirë?
Zilia.
Ekstravaganca jote më e madhe?
Të mos humbas asnjë opera që vjen në Londër.
Cili është udhëtimi yt i preferuar?
Të marr makinën dhe të udhëtoj pa destinacion drejt jugut, për të përfunduar në Vlorë, Dhërmi, Jalë, Vuno. Edhe në Positano, në bregdetin amalf, Itali.
Në ç’rast mund të gënjesh?
Atëherë kur mendoj se është e nevojshme.
Personi që përçmon më shumë?
Asnjë.
Cilat fjalë ose shprehje përdor më shpesh?
“Vërtet!”.
Pengu yt më i madh?
Asnjë.
Kur dhe ku ke qenë e lumtur?
Në periudha të ndryshme të jetës sime.
Në ç’gjendje shpirtërore je tani?
Diellore, me ndonjë re të vogël aty-këtu.
Nëse do të mundeshe të ndryshoje diçka te vetja, çfarë do ishte ajo?
Do doja të investoja për të shtuar njohuritë.
Ç’gjë e konsideron arritjen tënde më të madhe?
Akoma nuk e kam arritur.
Po të vdisje dhe të mund të rimishëroheshe në një tjetër njeri apo diçka tjetër, çfarë do doje të ishe?
Ilva Tare.
Po sikur të mund të shndërroheshe në diçka, ç’do të doje?
Këtë do ta vendos përpara se të vdes.
Cili është sendi më i çmuar që zotëron?
Fantazia ime.
Kë quan pikën më të thellë të mjerimit?
Dhimbjen e patolerueshme, të çfarëdo lloji.
Ku do të pëlqente të jetoje?
Aty ku po jetoj tani.
Ndër veprimtaritë që merresh, cila është e preferuara jote?
Të gjitha.
Cila është karakteristika jote më e spikatur?
Sensi i humorit.
Veçoria që pëlqen më shumë te një mashkull?
Të më bëjë të qesh. Misterioz, i ditur dhe i dashur. Edhe romanca ndihmon.
Veçoria që pëlqen më shumë te një femër?
Intelekti dhe mungesa e komplekseve.
Cilët janë shkrimtarët e tu të preferuar?
Ndryshojnë në periudha të ndryshme të jetës sime. Për momentin, Amos Oz.
Cili është heroi yt në art?
Peter Pan.
Kë ke heronj në jetën reale?
Nënë Terezën.
Cilat gjëra nuk të pëlqejnë fare?
Pabesia.
Si do pëlqeje të vdisje?
Në gjumë, vetëm. Duke pritur aventurën e radhës.
Cila është motoja jote?
“Ngrihu nga shtrati dhe shko bëj ç’ke në plan të bësh, edhe në rast se e urren”.